الفرق بين : النظام الفردى ونظام القائمة النسبية .....
بما ان الانتخابات قربت وفى كتير مننا اول مرة هيروحوا انتخابات عايزين
نعرف هننتخب ازاى خاصة اننا سمعنا كمان ان الانتخابات هتتعمل عن طريق
النظام الفردى ونظام القائمة النسبية – تعالوا نعرف ايه الفرق بين الانظمة
دى وازاى ننتخب ونصوت فى كل واحده
——————
... النظام الفردى
فى النظام دا مصر بتتقسم لعدد كبير من الدواير الانتخابية كل دايرة بينجح منها اتني...ن يدخلوا البرلمان
النظام دا اتسمى فردى علشان المرشح هنا بيتعامل مع الناخبيين على اساس انه فرد مش فى مجموعة حتى ولو كان منضم لحزب
فى شرط ان البرلمان لازم يكون نص الاعضاء على الاقل عمال وفلاحين علشان
كده فى كل دايرة لازم واحد على الاقل من الاتنين اللى ينجحوا يكون عمال
وفلاحين – لو نجحوا الاتنين عمال وفلاحين مفيش مشكلة وتبقى انتخابات صحيحة
لكن مينفعش ينجح الاتنين فئات
يوم الانتخابات لما تروح وتدخل اللجنة
الانتخابية هيسلموك ورقة فيها اسامى كل المرشحين فى دايرتك الانتخابية
وقصاد كل اسم رمز المرشح زى المسدس والجمل والنجفة وغيرها من الرموز وكمان
صفته الانتخابية يعنى هو عمال وفلاحين ولا فئات
لما تستلم الورقة هتختار اتنين من المرشحين وتعلم قدام الاسم بتاعهم بس لازم تتأكد انك اخترت واحد منهم على الاقل عمال وفلاحين
المرشح اللى هياخد اكتر من نص الاصوات يبقى هوه اللى نجح دا الشرط (50%+1)
يعنى اكتر من نص الاصوات حتى ولو بصوت واحد بس يعنى لو الدايرة 100 صوت
يبقى لازم ياخد على الاقل 51 صوت
طيب لو محدش من المرشحين خد اكتر من
نص الاصوات ؟ هنا بقى هتحصل جولة الاعاده وهتبقى بين اكتر اتنين خدوا اصوات
وفى جولة الاعاده شرط 50%+1 دا بيتلغى يعنى اللى ياخد اصوات اكتر وخلاص
ينجح
النظام الفردى بيبقى افضل للناس اللى عايزة ترشح نفسها لليرلمان
وهى مش تابعة لحزب وبالتالى وجود النظام دا بيديهم حرية انهم يترشحوا من
غير ما يبقى اجبار عليهم يدخلوا احزاب
————————–
القائمة النسبية
فى النظام ده مصر بتتقسم لعدد اقل من الدواير الانتخابية بس كل دايرة
بتبقى مساحتها أوسع وكل دايرة بيكون لها عدد اكبر من المقاعد فى البرلمان
ليه النظام دا اتسمى قائمة نسبية؟؟ اولا: قائمة علشان فى النظام دا
المرشحين بيبقوا مجموعات كل مجموعة بتبقى اسمها قائمة وبيكون عدد المرشحين
اللى فى القائمة بيساوى عدد المقاعد بتوع الدايرة فى البرلمان يعنى لو 10
مقاعد يبقى لازم كل قائمة تبقى فيها 10 اشخاص مرشحين ممكن يكونوا من حزب
واحد او اكتر من حزب مع بعض – ثانيا: نسبية علشان عدد المرشحين اللى
هيفوزوا من القائمة هيتحدد بناء على نسبة الاصوات اللى خدتها القائمة
طبعا برده لازم تبقى نص القائمة على الاقل عمال وفلاحين علشان شرط البرلمان
ودا بيتحقق فى القائمة عن طريق وضع مرشح فئات ووراه فى الترتيب مرشح عمال
وفلاحين وهكذا ومش من حقك كناخب انك تتدخل فى تغيير الترتيب
يوم الانتخاب هتستلم استمارة فيها بس اسماء القوائم المرشحة والرمز بتاع كل قائمة
هتختار القائمة اللى عايز تديها صوتك وتعلم قدامها
الرمز هيبقى موحد لكل حزب على مستوى الجمهورية علشان تعرف القائمة بتاعته بسهولة
علشان نعرف كل قائمة هتاخد كام مقعد فى البرلمان بعد التصويت هنفترض المثال دا
الدايرة فيها 1000 صوت وعندنا 4 قوائم مرشحين وعدد المقاعد المخصصة
للدائرة فى البرلمان 10 مقاعد وكل قائمة خدت يوم الانتخاب مجموعة من
الاصوات كالتالى
قائمة أ: خدت 400 صوت يعنى 40% من الاصوات
قائمة ب: خدت 300 صوت يعنى 30% من الاصوات
قائمة ج: خدت 200 صوت يعنى 20% من الاصوات
قائمة د: خدت 100 صوت يعنى 10% من الاصوات
اذا قائمة أ تاخد 40% من المقاعد المخصصة للدايرة يعنى هتاخد 4 مقاعد من 10
قائمة ب تاخد 30% من المقاعد المخصصة للدايرة يعنى هتاخد 3 مقاعد من 10
قائمة ج تاخد 20% من المقاعد المخصصة للدايرة يعنى هتاخد 2 مقاعد من 10
قائمة د تاخد 10% من المقاعد المخصصة للدايرة يعنى هتاخد 1 مقاعد من 10
هنا بقى فى مجموعة ( أ ) لها 4 مقاعد والقائمة بتاعتها فيها 10 افراد مين اللى هيروح منهم البرلمان؟؟
بيتاخد اول 4 اسماء مكتوبين فى القائمة بالترتيب والنظام دا هيطبق فى بقية
القوائم يعنى مجموعة (ب) هتاخد من القائمة بتاعتها او 3 اسماء مكتوبة تبعا
للترتيب وهكذا فى بقية القوائم
ترتيب الاسماء فى القائمة بيبقى تبعا
لمعايير كتير بتحطها الاحزاب وبتختلف من حزب لحزب ممكن علشان المرشح دا له
شعبية كبيرة فيبقى اسمه فى الاول او ان مرشح تانى له خبرة سياسية كبيرة
فيبقى اسمه فى اول القائمة وهكذا
احيانا بيبقى فى شرط ان القائمة لازم تحقق نسبة معينة من الاصوات علشان تقدر انها تتدخل فى عملية تقسيم المقاعد
موضوع: الفرق بين : النظام الفردى ونظام القائمة النسبية .....